Scoligna all'aria frestgaMintga venderde dumang èn las mussadras cun lour scolar(a)s an gir oravant. La premaveira ed igl aton spassegian els communablamaintg alla plazza da giuier Lareschs e gioldan lò igl gôt e da giuier ordafora. D’anviern dastgan igls unfants eir mintgamai an pitschnas gruppas sen pista – accumpagneas da tat(ta)s, babs u mammas digls unfants. Er schiglio peglian las mussadras adegna puspe l’occasiun dad eir cugls unfants ainten l’aria frestga – seia chegl per tschartger igls nias da Pasca, per amplantar ena planta u per sa sdualar ainten la neiv.Visetas alla biblioteca: sfunsar aint igl mond digls codeschsGist visavia alla scola sa catta la Biblioteca populara Savognin bagn manada. Regularmaintg visetan las classas dalla scoligna e las classas primaras cun lour persungas d’instrucziun la biblioteca per amprestar codeschs novs u per tadlar ena istorgia tgi la bibliotecara Nora Netzer rachinta ad els. Agls unfants vign cotras musso pi manevel igl mond variont e coloro digls codeschs scu er sviglia igl plascheir da liger e sfiglier.Roms facultativs pigl scalem superiourSegl scalem superiour pon scolar(a)s tscherner tranter 8 roms facultativs scu art tecnic, art textil, cuschinar, franzos, medias ed informatica, musica, taliang e sport. La fegnameira è tgi igls giuvenils possan agiuntar lour urari cun roms tgi igls interesseschan e fon plascheir. Las persungas d’instrucziun èn cò fitg creativ(a)s. Per exaimpel tar igl rom facultativ sport treneschan igls giuvenils ainten la halla da gimnastica, visetan igl maraton da skis engiadines u sa scliveglian segl clutger da glatsch.