Gio da divers onns ègl basigns da sanar e renovar la scoligna e la scola primara Grava a Savognin. Divers lis per en bietg nov èn nias examinos e nias sottamess alla radunanza communala per la decisiun. La radunanza communala digls 10 da matg 2021 è sa decideida per igl li existent a Grava. Siva tgi la dumonda digl li è stada sclareida è neida publitgeida ena concurrenza d’architectura per la construcziun nova dalla tgesa da scola primara Grava. Ples projects èn nias inoltros. Igl matg 2022 è nia tscharnia igl project victour dalla ARGE Ruch & Parner Architekten / RBA Architekten, Son Murezza. Igl project victour adamplescha las pretensiuns d'ena scola conforma agl taimp ed orientada agl futur. Igls 28 d'otgover 2024 è stada l'amprema badigleida dalla nova scola Grava a Savognin. Daple infurmaziuns cattez cun cliccar segl link: badigleida nova tgesa da scola Grava Lavours actualas Las lavours finalas èn an totta lengia: lavours da geis, da pictour e da scrinari èn fittadas, igls ischs davains èn montos. Actualmaintg marschan las collaudaziuns e la messa an funcziun, scu er la nattageda digl bietg. L'antschatta da fanadour on li las differentas collaudaziuns; igl madem mument vign furneida la nova mobiglia. Las lavours da conturn ainfra igl perimeter vignan terminadas anfignen ca. igls 10 da fanadour. Daple Descripziun digl project construcziun nova dalla Scola Grava e sanaziun parziala digl edifezi polivalent Igl project dalla construcziun nova dalla Scola Grava cumpeglia ena restructuraziun ed amplificaziun extendeida digl cumplex da scola existent. A madem taimp vign sano ed amplifitgia parzialmaintg er igl edifezi polivalent. I vign realiso ena nova tgesa da scola primara cun scoligna ed en pavigliun per la structura digl de (meisa da mezde e tgira d’unfants extrascolara). La nova tgesa da scola per la scoligna e primara a Grava vign erueida dalla vart agl ost dalla parcella e vign a dar en accent marcant all’architectura locala. Igl nov pavigliun dalla structura digl de vign plazzo ainten la part agl sid dalla parcella an direcziun digl Schletg. Daple Plascheir da daple Spazi e daple pussebladads La construcziun nova dalla tgesa da scola per la scoligna e per la primara è per la scola e pigl cumegn ena gronda sfeida. Ma anc pi grond è igl plascheir dad ena nova scola an la quala betg angal aspects funcziunals scu plaz ed indrezs stattan aint igl center, mabagn noua tgi er giavieschs tgi fon la scola pi varionta, veiva ed inspironta on plaz. Igl edifezi nov pussibilitescha en model da scola conform agl taimp cun spazis d'amprender flexibels. Er igls cunsegls da scolar(a)s èn sa fatgs partratgs ansemen cun lour conscolar(a)s e conscolars. Ordlonder è do en curt video tgi serva agls architects scu basa. Ena resumaziun dallas ideias e propostas cattez segl documaint agiunto. Travagl da scola durant la fasa da construcziun Durant la fasa da construcziun dalla nova tgesa da scola per la scoligna e la scola primara a Grava ò li l'instrucziun pigls unfants da scoligna e per las scolaras ed igls scolars dall'amprema primara anfignen la terza superioura suandontamaintg: igl travagl da scoligna ò li, scu gio igl onn da scola 2023/24 ed igl onn da scola 2024/25 ainten la Villa Aurora a Savognin. las scolaras ed igls scolars dalla 1. – 3. classa primara vignan instruias a Salouf las scolaras ed igls scolars dallas 5. classas primaras visetan durant igl onn da scola 2025/26 l’instrucziun a Naloz (anterioura tgesa communala Savognin) las scolaras ed igls scolars dalla 4. classa primara e dalla 6. classa primara e dall' 1. – 3. superioura vignan instruias ainten la tgesa da scola Barnagn a Savognin la luvranta sociala da scola è preschainta en mez de a Salouf ed en de a mez a Savognin. la logopedia ò li a Salouf ed ainten la Villa Aurora la survigilaziun da mezde vign purscheida a Salouf per las scolaras ed igls scolars tgi frequaintan la scola a Salouf ed a Savognin per scolaras e scolars tgi frequaintan la scola a Savognin